إِنَّا لِلّهِ وَإِنَّـا إِلَيْهِ رَاجِعونَ - حضرت علامہ خادم حسین رضوی کی سوانح حیات

إِنَّا لِلّهِ وَإِنَّـا إِلَيْهِ رَاجِعونَ - حضرت علامہ خادم حسین

 رضوی رحمہ اللہ

ہمارے ہاں یہ رواج ہے کہ دنیا سے جانے کے بعد مرحوم کو اچھے الفاظ میں یاد کیا جائے۔ دنیا سے جانے کے بعد ہر شخص کی برائیاں بھلا کر اس کی اچھائیوں کو یاد کیا جاتا ہے۔ یہ ہمارے دین کی بھی تعلیم ہے کہ اپنے مردوں کو اچھے الفاظ میں یاد کرو۔

لیکن کچھ شخصیات اپنی زندگی میں ایسے کام کر جاتی ہیں کہ ہر دل میں ان کی محبت پیدا ہو جاتی ہے۔ ان کو یاد کرنے کے لیے کسی کو کہنا نہیں پڑتا بلکہ لوگ خود بخود ان کو یاد کرتے ہیں۔ ان کی زندگی ہی ایسی ہوتی ہے کہ وہ مرنے کے بعد بھی زندہ رہتے ہیں۔

ایسی ہی ایک شخصیت حضرت علامہ خادم حسین رضوی رحمہ اللہ کی تھی۔ آپ نے اپنی ساری زندگی عشق رسول صلی اللہ علیہ وسلم کے لیے وقف کر دی۔ آپ کا نام آتے ہی زبان پر نعرہ لبیک یا رسول اللہ آ جاتا ہے۔

عشق رسول میں ڈوبی زندگی

آپ کی زبان پر ہمیشہ نبی کریم صلی اللہ علیہ وسلم کی محبت اور عشق کی بات رہی۔ آپ کی یہی ادا آپ کی پہچان بن گئی۔ آپ جہاں بھی جاتے، جس محفل میں بھی بیٹھتے، آپ کا موضوع صرف اور صرف عشق رسول ہوتا۔ آپ نے اپنی زندگی سیرتِ رسول ﷺ اور عشقِ رسول ﷺ کی خدمت کے لیے وقف کر دی۔ آپ نے کبھی دنیاوی مال و دولت کی پرواہ نہیں کی۔ آپ کی ساری زندگی سادگی میں گزری۔

آپ کی تقاریر میں ایک سوز تھا، ایک درد تھا جو سیدھا دل میں اتر جاتا تھا۔ آپ جب نبی کریم ﷺ کی شان بیان کرتے تو ایسا لگتا جیسے آپ خود اس محفل میں موجود ہوں۔ آپ نے ناموس رسالت کے لیے جو خدمات انجام دیں وہ تاریخ میں ہمیشہ یاد رکھی جائیں گی۔

آپ کی وفات بھی جمعہ کے دن ہوئی اور آپ کی زندگی کا آخری وقت بھی دین کی خدمت میں گزرا، یہ اللہ والوں کی نشانی ہوتی ہے۔ اللہ تعالی اپنے نیک بندوں کو جمعہ کے دن اپنے پاس بلاتا ہے۔ آپ کی وفات کی خبر جب آئی تو ہر آنکھ اشکبار تھی۔ ہر دل غمگین تھا۔ لاکھوں کا جنازہ اس بات کا ثبوت تھا کہ اللہ نے آپ سے کیسا کام لیا اور لوگوں کے دلوں میں آپ کی کیسی محبت ڈالی۔

محمد کے غلاموں کا کفن میلا نہیں ہوتا

شاعر نے کیا خوب کہا ہے

زمیں میلی نہیں ہوتی

زمن میلا نہیں ہوتا

محمد کے غلاموں کا

کفن میلا نہیں ہوتا

یہ شعر حضرت علامہ خادم حسین رضوی پر بالکل صادق آتا ہے۔ جنہوں نے اپنی پوری زندگی حضور ﷺ کی غلامی میں گزاری، اللہ نے ان کی قبر کو بھی روشن کر دیا۔ آج بھی ان کے مزار پر ہزاروں لوگ حاضری دیتے ہیں اور ان کے لیے دعائے مغفرت کرتے ہیں۔

ہمیں بھی زندگی سے سبق لینا چاہیے کہ ہم ہر وقت اپنی موت کے لیے تیار رہیں اور ہماری زندگی کا ہر عمل اللہ اور اس کے رسول کی رضا کے لیے ہو۔ یہی ہماری نجات کا ذریعہ بنے گا۔ یہ دنیا فانی ہے، ہر کسی نے ایک دن جانا ہے۔ اصل کامیابی یہ ہے کہ ہم اپنے پیچھے ایسے اعمال چھوڑ جائیں کہ لوگ ہمیں اچھے لفظوں میں یاد کریں۔

آپ کی خدمات اور قربانیاں

حضرت علامہ خادم حسین رضوی رحمہ اللہ کی سب سے بڑی پہچان یہ تھی کہ آپ نے کبھی حق بات کہنے سے دریغ نہیں کیا۔ آپ نے اپنی زندگی میں بہت سی مشکلات اور آزمائشیں دیکھیں، جیل کی صعوبتیں برداشت کیں، لیکن عشق رسول ﷺ کے راستے سے ایک قدم بھی پیچھے نہیں ہٹے۔ آپ کی للکار میں ایک ایسی گرج تھی جو باطل کے ایوانوں کو ہلا دیتی تھی۔ آپ نے نوجوان نسل کے دلوں میں عشق رسول کا ایسا چراغ جلایا جو آج بھی روشن ہے۔ آپ نے ثابت کیا کہ جب نیت اللہ اور اس کے رسول کے لیے ہو تو اللہ تعالیٰ خود مدد فرماتا ہے۔

اللہ تعالی حضرت کے درجات بلند فرمائے، ان کی قبر پر کروڑوں رحمتیں نازل فرمائے اور ہمیں بھی ان کے نقش قدم پر چلنے کی توفیق عطا فرمائے، آمین۔