*سال 2021 کا اختتامی جائزہ - اہم ملکی اور بین الاقوامی واقعات*

سال 2021 بھی اپنے اختتام کو پہنچا۔ یہ سال دنیا بھر کی طرح پاکستان کے لیے بھی کئی حوالوں سے بہت اہم رہا۔ کہیں خوشی تو کہیں غم، اس سال میں کئی ایسے واقعات ہوئے جنہوں نے تاریخ پر گہرے نقوش چھوڑے۔

کورونا اور صحت:

سال 2020 کے مقابلے میں 2021 کے آخر تک کورونا کی صورتحال میں کافی بہتری دیکھنے میں آئی۔ حکومت کی جانب سے ویکسینیشن مہم کا آغاز کیا گیا جس سے لاکھوں لوگوں کو ویکسین لگائی گئی۔ تاہم اس سال کے آخر میں ڈینگی کے کیسز میں بھی خطرناک حد تک اضافہ دیکھا گیا، خاص طور پر لاہور، کراچی اور اسلام آباد میں ہزاروں افراد ڈینگی سے متاثر ہوئے۔

معیشت اور مہنگائی:
مہنگائی کی بات کی جائے تو 2021 عوام الناس پر کافی بھاری گزرا۔ اس سال پیٹرولیم مصنوعات کی قیمتوں اور ڈالر کی قدر میں مسلسل اضافہ دیکھا گیا۔ تیل، پیٹرول سے لے کر اشیاء خوردونوش، آٹا، چینی، گھی تک ہر چیز کی قیمت کا گراف اوپر کی طرف بڑھتا ہی چلا گیا جو کہ اب تک تھمنے کا نام نہیں لے رہا۔ رپورٹس کے مطابق اس ایک سال میں بیس لاکھ سے زیادہ افراد غربت کی لکیر سے نیچے چلے گئے۔ عوام آج بھی انتظار میں ہے کہ مہنگائی کے اس جن پر کب قابو پایا جائے گا۔

ملک کے اہم واقعات:
اس سال کئی اہم اور افسوسناک واقعات پیش آئے۔ کوئٹہ کے ایک ہوٹل کی پارکنگ میں دھماکہ، گھوٹکی میں دو ٹرینوں کا خوفناک تصادم جس میں درجنوں افراد جاں بحق ہوئے، اور مختلف شہروں میں سیاسی و مذہبی جماعتوں کے احتجاجی مظاہرے اہم خبروں میں شامل رہے۔ اس کے علاوہ مہنگائی کے خلاف اپوزیشن جماعتوں نے ملک گیر احتجاج بھی کیے۔

بین الاقوامی واقعات:
بین الاقوامی سطح پر دو بڑے واقعات ہوئے۔ پہلا، مئی 2021 میں مسجد اقصیٰ میں پیش آنے والا واقعہ جس پر دنیا بھر کے مسلمانوں میں شدید غم و غصہ دیکھا گیا۔ اس حوالے سے اقوام متحدہ کی سلامتی کونسل کا ہنگامی اجلاس بھی منعقد ہوا جس میں ترکی، پاکستان اور فلسطین کے نمائندوں نے اپنا مؤقف پیش کیا

اقوام متحدہ کے اجلاس میں اس واقعے کے حوالے سےامن کی اپیل کی گئ۔ 

دوسرا بڑا واقعہ اگست 2021 میں افغانستان کی صورتحال میں بڑی تبدیلی تھی۔ 20 سال بعد امریکہ نے افغانستان سے اپنی افواج کا انخلا مکمل کیا اور طالبان نے کابل کا کنٹرول سنبھال لیا۔ اس واقعے نے پوری دنیا کی سیاست پر اثر ڈالا۔

کھیلوں کی دنیا:
سال 2021 کھیلوں کے لیے اچھا رہا۔ متحدہ عرب امارات میں ہونے والے ٹی ٹوئنٹی ورلڈ کپ میں پاکستان کرکٹ ٹیم کی کارکردگی کو بہت سراہا گیا، خاص طور پر بھارت کے خلاف تاریخی فتح نے قوم کو بہت خوش کیا۔ اس کے علاوہ ٹوکیو اولمپکس میں پاکستان کے ایتھلیٹ ارشد ندیم نے جیولین تھرو میں شاندار کارکردگی دکھائی۔ اگرچہ کوئی تمغہ تو نہ جیت پائے لیکن اس کے باوجود اپنی اچھی پرفارمنس کے سبب دنیا بھر میں خبروں کی زینت بنے رہے۔

سال کے آخر کا افسوسناک واقعہ:

سال کے اختتام پر سیالکوٹ میں ایک انتہائی افسوسناک واقعہ پیش آیا جس میں ایک فیکٹری کے سری لنکن مینیجر کو مشتعل ہجوم نے تشدد کا نشانہ بنایا۔ اس واقعے کی پاکستان سمیت دنیا بھر میں شدید مذمت کی گئی۔ وزیراعظم نے اس کا نوٹس لیتے ہوئے ملوث افراد کو فوری گرفتار کرنے کا حکم دیا۔

مشہور شخصیات کا انتقال:

اس سال شوبز اور ادب کی دنیا کی کئی معروف شخصیات ہم سے جدا ہو گئیں۔ معروف ڈرامہ نگار حسینہ معین، اداکارہ دردانہ بٹ، بچوں کے ہر دلعزیز کردار انکل سرگم کے خالق فاروق کیسر اور کامیڈی کے بے تاج بادشاہ عمر شریف اس سال انتقال کر گئے۔ ان کی وفات سے پاکستانی شوبز انڈسٹری میں ایک ایسا خلا پیدا ہوا جو کبھی پر نہیں ہو سکتا۔

پی ایس ایل 6 اور نیوزی لینڈ ٹیم کا دورہ:
سال 2021 میں پاکستان سپر لیگ کا چھٹا ایڈیشن منعقد ہوا جس میں ملتان سلطانز نے پہلی بار ٹائٹل جیتا۔ اسی سال ستمبر میں نیوزی لینڈ کرکٹ ٹیم 18 سال بعد پاکستان آئی لیکن سیکیورٹی وجوہات کی بنا پر آخری لمحات میں دورہ منسوخ کر کے واپس چلی گئی، جس پر پاکستانی شائقین کرکٹ میں مایوسی پھیلی۔ بعد میں ویسٹ انڈیز کی ٹیم نے پاکستان کا دورہ کر کے کرکٹ کے میدانوں کو دوبارہ آباد کیا۔

احساس پروگرام اور صحت انصاف کارڈ:
2021 میں حکومت پاکستان نے غربت کے خاتمے کے لیے احساس پروگرام کو مزید وسعت دی۔ اس کے تحت مستحق خاندانوں کو ماہانہ امداد فراہم کی گئی۔ اس کے علاوہ خیبر پختونخوا اور پنجاب میں صحت انصاف کارڈ کا اجرا ایک بڑا قدم تھا، جس کے ذریعے ہر خاندان کو 10 لاکھ روپے تک مفت علاج کی سہولت فراہم کی گئی۔ اس اقدام کو عالمی سطح پر بھی سراہا گیا۔

یوں خوشی اور غم کے ملے جلے واقعات کے ساتھ یہ سال 2021 اپنے اختتام کو پہنچا اور بس کچھ ہی گھڑیوں بعد اس سال کا آخری سورج ڈھل جائے گا اور ہم 2022 میں قدم رکھیں  گے۔