عمر ِ فاروقؓ یکم محرم الحرام

خلیفہ دوم، فاتح روم و ایران، مراد رسول ﷺ، سیدنا عمر فاروق رضی اللہ عنہ

تمام صحابہ کرام رضی اللہ عنہم حضور ﷺ کے مرید ہیں، لیکن ان میں سے اگر کوئی مرادِ مصطفیٰ ﷺ ہے تو وہ سیدنا عمر فاروق رضی اللہ عنہ ہیں۔

آپ رضی اللہ عنہ وہ عظیم ہستی ہیں جو منصب خلافت سنبھالنے کے بعد فرماتے تھے کہ اگر میری کوئی بات قابل اعتراض لگے تو مجھے اس پر ٹوک دیا جائے۔ سبحان اللہ، دلیری اور ہمت کا یہ عالم تھا۔

اور آج کے حکمران اپنا حساب دینے کو اپنی توہین سمجھتے ہیں۔ آج ملک کے حالات دیکھ کر دل خون کے آنسو روتا ہے، ایسے میں سیدنا عمر فاروق رضی اللہ عنہ بہت یاد آتے ہیں۔

وہ اپنے دور حکومت میں ایک جانور کے پیاسے مر جانے کی فکر کرتے تھے کہ اس کا بھی اللہ مجھ سے سوال کرے گا، اور آج ہمارے حکمران ہیں کہ یہاں انسان خودکشیاں کرنے پر مجبور ہیں لیکن انہیں کوئی فکر نہیں۔ بھوک، افلاس اور فاقہ کشی میں عوام گھری ہوئی ہے۔

ان کا دور تھا تو خوشحالی کا یہ عالم تھا کہ دینے والے ہاتھ تو بہت تھے مگر لینے والا کوئی ضرورت مند نہ تھا۔ ہمارے حکمرانوں کے پاس ہمیں دینے کے لیے صرف باتیں ہیں، خوشحالی اور سہولیات نہیں۔

عدل و ہیبت

حضرت عمر فاروق رضی اللہ عنہ کا عدل آج بھی دنیا کے لیے مثال ہے۔ آپ رضی اللہ عنہ کی ایمانی شخصیت کی ایسی  ہیبت  تھی  کہ شیطان بھی آپ کو دیکھ کر راستہ بدل لیتا تھا، لیکن اسی ہیبت والے شخص کا دل رعایا کے لیے موم سے بھی زیادہ نرم تھا۔ آپ فرماتے تھے کہ اگر دریائے فرات کے کنارے ایک کتا بھی پیاسا مر گیا تو قیامت کے دن عمر سے اس کے بارے میں پوچھا جائے گا۔ یہ احساسِ ذمہ داری ہی تھا جس نے آپ کی خلافت کو دنیا کی سب سے مثالی ریاست بنا دیا۔

سادگی و بے خوفی

آپ رضی اللہ عنہ کی سادگی کا عالم یہ تھا کہ 22 لاکھ مربع میل کے حکمران ہونے کے باوجود آپ کے کپڑوں پر پیوند لگے ہوتے تھے اور آپ زمین پر بیٹھ کر عام لوگوں کے ساتھ کھانا کھاتے تھے۔ آپ نے کبھی اپنے لیے کوئی محل نہیں بنایا، آپ کا تخت ایک عام چٹائی تھی۔ آپ کے دربار میں امیر اور غریب، طاقتور اور کمزور سب کے لیے انصاف برابر تھا۔ یہی وجہ تھی کہ آپ کی خلافت میں کوئی ظالم ظلم کرنے سے پہلے ہزار بار سوچتا تھا۔

لیکن یہ بھی ایک زندہ حقیقت ہے کہ اس وقت کی عوام اور اس وقت کی عوام میں فرق بھی تو دیکھیں۔ آج ہم میں سے کتنے انصاف کے علمبردار ہیں؟ آج ہم میں سے کتنے قانون کا نفاذ چاہتے ہیں جو ہم منصف حکمران 

deserve

 کریں؟

ہم کیسے سیدنا ابوبکر صدیق، عمر فاروق، عثمان غنی اور مولا علی رضی اللہ عنہم جیسے حکمران

 deserve

 کر سکتے ہیں؟ کونسی دو نمبری ہمارے ہاں نہیں پائی جاتی؟

سرکاری ادارے ہوں یا پرائیویٹ، اچھائی بہت مشکل سے دکھائی دیتی ہے۔

ہمیں اگر عادل، منصف، سچے، کھرے لیڈران چاہئیں تو بحیثیت قوم ہر فرد کو خود کو بدلنا ہوگا۔ پہلے ہمیں اپنے اندر سے بے ایمانی کا خاتمہ کرنا ہوگا، جھوٹ اور دھوکہ دہی سے اپنے معاملات کو صاف کرنا ہوگا۔

ہر شخص اپنے شعبے میں دیانتداری اور ایمانداری کا ثبوت دے۔ نوکری، کاروبار، تجارت غرض کہ ہر پیشے میں سے دھوکہ بازی، جھوٹ، فراڈ اور جعل سازی کو ختم کرے۔

تب ہم بحیثیت قوم اس قابل بن سکیں گے کہ ہم ایک ایسے حکمران کے مستحق ہوں جو منصف ہوگا، صادق و امین ہوگا، جو اپنی رعایا کے لیے رحم دل ہوگا۔

اب بھی وقت شاید کچھ ہماری مٹھی میں بچا ہے کہ ہم اس پہلو پر غور کریں، ورنہ ہم ان طاقتور طبقوں کے ہاتھوں غربت و افلاس اور لا قانونیت کی چکی میں پستے رہیں گے۔

نفسا نفسی اور لوٹ مار کے اس دور میں اب بھی وقت ہے کہ ہم اپنے معاملات کو سدھار لیں، اپنے قبلے درست کر لیں تو ہم بھی بحیثیت قوم دنیا میں اپنا لوہا منوا سکیں گے۔

اس بارے میں ذرا نہیں

پورا سوچیے۔