عورت کا پردہ یا مرد کی تربیت اصل مسئلہ کیا ہے؟

 

عورت کا پردہ یا مرد کی تربیت اصل مسئلہ کیا ہے؟

کہا جاتا ہے  کہ عورت گھر میں رہے گی تو فتنے نہیں پھیلیں گے اور یہ کہہ کر معاشرے کے ہر بگاڑ کو عورت سے جوڑ دیا جاتا ہے۔  اس کے لباس سے اس کے انداز سے۔ اس کی چال سے۔

لیکن  ہمارے معاشرے کے  مسائل کی اصل وجہ کیا  عورت ہی ہے؟ یا اصل وجہ سے جی چرانے کے لیے اوپر بیان وجوہات ہم نے خود سے گڑھ لی ہیں؟

آئے دن ہراسانی کے واقعات ہماری نظروں سےگزرتے ہیں یہ کون کرتا ہے؟

کیا سڑک پر  چلتے مردوں کو عورتیں تنگ کرتی ہیں؟ آتے جاتے اشارے کرتی ہیں ؟

عزت پر حملہ کون کرتا ہے مرد یاں عورت ؟

تیزاب گردی کون کرتا ہے؟

کیا آپ نے اپنی زندگی میں کبھی سنا ہے کہ کسی عورت نے کسی مرد پر تیزاب پھینکا ہو؟

یا راہ چلتے آواز کَسی ہو یا چھیڑا  ہو؟

اسکول کالج یونیورسٹوں میں بچیوں کو بلیک میل کرنا ۔ ان سے ناجائز مطالبات کرنا پھر انکار کیے جانے کی صورت امتحان میں فیل کردینے کی دھمکی دینا۔ 

اس طرح کے شرمناک معاملات کرتے آپ کو کون ملے گا؟ مرد یا عورتیں؟

پھر معاشرے میں موجود بُرائیوں کو  ایک جنس سے جوڑنا کہاں کا انصاف ہوا؟

نبی پاک ﷺ  نے  حجتہ الوداع کے موقع  فرمایا تھا کہ  "عورتوں کے معاملے میں اللہ سے ڈرو۔

کیا یہ  حکم  اپنے بیٹوں کی تربیت کرتے وقت  دھیان میں رکھا جاتا ہے؟

اور اس وقت حالات یہ ہو گئے ہیں کہ ہمارے معاشرے میں چند ماہ کی بچی کی عزت  بھی محفوظ نہیں ہے۔

 بچیاں  نظروں سے اوجھل ہوں تو دل گھبرانے لگ جاتا ہے کیوں کہ آئے دن اس طرح کے حادثات سنتے رہتے ہیں۔

لڑکی کا منہ ڈھک دو

 سر ڈھک لو

 سینہ ڈھانپو

تنگ کپڑے مت پہناؤ تو ہی وہ محفوظ رہے گی؟

پردہ اللہ کا حکم ہے بیشک اللہ کا حکم سر آنکھوں پر۔ مگر یہ حقیقت بھی افسوس ناک ہےکہ  ہمارے ہاں زیادہ تر خواتین مردوں کی ُبُری نظروں سے بچانے کے لیے خود کو ڈھکتی ہیں۔ 

بیٹیوں کو چھپانے  کے ساتھ ساتھ بیٹوں کی تربیت پر زیادہ توجہ درکار ہے۔

اب ضرورت اس امر کی ہے کہ ہم گھروں میں اپنے بیٹوں کے سامنے اپنی ماں، بہن، بیوی، بیٹی کی عزت کریں، تاکہ کل یہی بیٹے گھر سے باہر دوسروں کی بہن بیٹیوں کی عزت کرنا سیکھیں۔ اور  بیٹے کو یہ سکھانے میں  ماں سے زیادہ اہم کردار والد کا ہے۔ کیوں کہ بیٹے کی زندگی میں سب سے پہلے باپ ہی اس کا رول ماڈل ہوتا ہے۔ اسلیے والد پر ماں سے زیادہ بیٹے کی تربیت کی ذمہ داری عائد ہوتی ہے۔ اپنے  گھروں میں اپنی سولادوں کے سامنے اپنے کردار  اور اخلاق کو اس طرح کا رکھیں کہ آپ کے بیٹے  کے سامنے یک مکمل کردار کی  بہترین شخصیت  موجود ہو۔ جس سے  وہ سیکھیں کہ اسے بھی ایس بننا ہے اور گھر میں یاں گھر سے باہر ہر جگہ  صنفِ نازک کا احترام کرنا ہے۔

آئے دن بچے بچیوں سے متعلق درد ناک خبریں ہمارے دلوں کو چھلنی کردیتی ہیں۔

اسکول کالج دفتر جانے کے لیے گھر سے نکلنے والی بچیوں کے گھر والے ان کے خیر و عافیت سے واپس گھر لوٹ آنے تک بے چین رہتے ہیں۔ 

 اب ان مسائل پر قابو پانے کے لیے ہر فرد کو یہ ذمہ داری سنبھالنی ہوگی۔ تاکہ ہمارے معاشرے میں ہر عورت ہر بچی خود کو محفوظ سمجھے۔ 

بیٹوں کو تعلیم اور دیگر سہولیات مہیا کرنے کے ساتھ ساتھ  والدین کو ان کی تریت میں یہ بنیادی باتیں بھی شامل کرنی چاہیے کہ ان کی موجودگی کسی دوسرے کی بیٹی کے لیےخوف یاں پریشانی کاباعث نا ہو۔

اس بارے میں زرا نہیں

 پورا سوچیں۔۔

شکریہ

میں نے یہ تحریر ارد گرد کے حالات و واقعات دیکھتے ہوئے لکھی ہے۔ 

بچوں کی تربیت کے حوالے سے لکھی گئے معلوماتی آرٹیکل پڑھنے کے لیے یہاں کلک کریں